نوێترین

كورتەیەك لە ژیانی (كۆساری) شەهید و شاعیر

كورتەیەك لە ژیانی (كۆساری)  شەهید و  شاعیر


نوسینی: ڕێبوار كوێستانی    
تایبه‌ت به‌ ماڵپه‌ری ئاهی خه‌م

شیعر ئەمڕۆ ، 
وەك باسریشك و
گڤەی ڕەشەبای كانونێ‌ ،
گڕ لە نێو چاوی دەبارێ‌...
ئێستا وشە و كێش و سەروا
برووسكە دەدەن ، 
وەك هەوری تووڕەی بەهارێ‌...
ئەم كانونە ،
شیعری ڕاپەڕیو برایمۆكە و 
كەنار (قولە) و (كوێرەكانی) ی
لێ‌ حەرامە و ، لە دەروازەی شار جێی نابێ‌
كاتی دادگای پشكنینە و 
لە ترسی (یاسا)ی دارستان ، شیعر مەگەر
خۆی لە نێو كانیاوی دڵی
پڕ لە باوەڕ حەشار دابێ‌
تەماشا كەن ،
دەستی نەفامی و تاریكی
پەنجەی كۆساری دەشكێنێ‌...
قەڵەمەكەی كە پەرژینی كوردستانە ، 
لە خوێنی خۆی دەگەوزێنێ‌...
ڕووناكایی ،
لە نێو شاردا قەدەغەیە...
ئاخنراوە و نەفەس نادا
چی دەلاقە و پەنجەرەیە...
بەڵام هەرگیز كوردستانم 
وەجاخ كوێر و ،
بێ‌ بەهرەی زۆر مەزن نابێ‌
قەت شیعر و جوانی و داهێنان
لە وڵاتی ،
(خانی) و (نالی) و (مەولەوی)دا
نافەوتێ‌ و شوێنە ون نابێ‌...

    ساڵی 1967(ز) لە گەرمەی ژان و ناسۆری گەلی كورد و ، دەبەرێكڕاچوونی ڕەش وسپی و ڕاست و درۆ و پێشمەرگە و كرێ‌ گرتەدا ، لە رانیەی ئامێزی كێوەڕەشدا ، منداڵێك چاوی بە (قولە) و (كوێرەكانی) هەڵێنا ،  كەس نەیدەزانی ڕۆژێك بەهرە مەزنەكەی وەكو كانیاو دەتەقێت و ، لە پەنا هەر دڕكێك گوڵێك دەڕوێنێت و ، كوردستانە بێ‌ نازەكەی دەكاتە گوڵستان و ، سەرەنجام داستانی نەمری ئیسلام و ئیسلامی بوونی نیشتیمانەكەی (شێخ سەعید) و (نووڕسی) بە خوێنی خۆی وا بە زەقی لە سەر تاشە بەردەكانی كوردستانەكەی  دەنووسێ‌ ، كە جاهیلیەت چاوی بە خوێن بنگوێت و ، وەك شەمشەمەكوێرە لە قوژبنی تاریكی نا ئومێدی خۆی بخزێت و ، لەوەدیهاتنی زیندە خەونەكانی تەما بڕ بێت...



    دژواری و سەختی ژیان مۆڵەتیان نەداوە لە پۆلی یەكەمی ناوەندی پتر درێژە بە خوێندن بدات و ، ناچار شانی داوەتە بەر كار و كاسبی و ، بەینێك بە سەر تاشی و ماوەیەكیش بە زێڕنگەری و هەندێك ئیشی دیكەوە سەر قاڵ بووە ...
    ئەو ڕابوونە ئیسلامی یە بە گوڕەی لە سەرەتای هەشتاكانەوە هەموو بەشەكانی كوردستانی سەر بە عێراق و بە تایبەتی ناوچەی ڕانیەی گرتبۆوە ، ژێی هەستە ناسكەكەی كۆساریشی وەكو چەندەها لاوی خوێن گەرمی دی لەراندەوە و ، ئاوازی بە سۆزی وریا بوونەوە و چاوكرانەوەی لێ‌ هەستاند و ، ساڵی 1987 كۆساری وەك لاوێكی ڕووناكبیر لە باوەشی گرت و ، لە تاریكستانی جاهیلیەتی دەرهێنا و ، خستیە سەر ڕاستە شەقامی ڕێڕوونیی خودایی..

     گەلێك جاران دەیگوت (بە ڕاستی هیدایەتدان بەس شایستەی خوای گەورەیە ، من گەنجێكی تازە پێگەیشتوو بووم ، تاقانەی بابم بووم ، زۆر نازیان دەدامێ‌ ، هەموو شت لەبەردەستی خۆمدا بوو ، بە ئارەزووی خۆم هەڵس و كەوتم لە پارەو پوڵدا دەكرد ، بەڵام هیچ تامێكم لەو ژیانە نەدەكرد).
    هەر ئەو گەڕانەوەی بەرەو خواش بوو وای لێ كرد نەتوانێ‌ لە سەر سەربازیی بەردەوام بێت و فیرار كردن بە ئەركێكی شەرعیی بزانێ‌ .
     كۆساری گەلێك جار وشەی نایاب و دەگمەنی بە كاردەهێنان و یاری بە وشە دەكرد ، كە لەوەدا وێڕای گەڕان و سووڕانی خۆی ، سوودی لە دایك و باوكی وەردەگرت ، كە هەریەكەیان سەر بە هۆز و ناوچەیەكی كوردەواریی بوون ، دایكی ( دزەیی) و بابیشی (پشدەریی) بوو ... 

 شەهید كۆساری زۆر بەخشندە و دڵفراوان و هەژار دۆست و دڵناسك بوو ، لە دوای كۆڕەوەكە لە گەڵا هێزێكی  پێشمەرگەی بزووتنەوە لە نێو ڕانیە مابۆوە ، خزمەتی چەند پیر و پەككەوتەیەكی هەژاری دەكرد ، لە سەردەمی رژێمیشدا مشووری دابین كردنی خۆراكی بۆ ( مام صاڵح) ناوێكی نابینای رانیە دەخوارد و خزمەتی دەكرد ، هەروەها جگە لە كۆكردنەوەی كۆمەك لە خێرخوازان  زێری هاوسەرەكەشی لەسەر رەزامەندی خۆی  فرۆشت بۆ دەست گرتنی بنەماڵەی پێشمەرگەیەكی بزووتنەوە بە ناوی ( حمە سوور ) كە لەلایەن رژێمی بەعسەوە گیرابوو ...
   كۆساری لاوێكی ئازا و چاونەترس و بەزیپك بوو و ، لە شانە چەكدارەكانی بزووتنەوە دا و بەشداری لە راپەڕین گورج و گۆڵا و هەڵسوڕاو بوو ، سەرباری ئەوە خاوەنی گیانێكی پاك و لە خواترس بوو و زۆر بە نوێژی جەماعەتەوە پابەند بوو و، زۆربەی دوو شەممە و پێج شەممان بەرۆژوو بوو ، هەر دەگەڵ چاو ڕوون بوونەوەی بە تیرێژی خۆری گەشی ڕابوونی ئیسلامی لە ساڵی 1987 دا ، گەرما و گەرم بینی بە بناوانی زوڵاڵی ئەو ڕابوونە پیرۆزە وە ناوەو ,پەیوەندی بە ڕێكخستنەكانی بزوتنەوەی ئیسلامی یەوە كردوە و ڕۆڵێكی دیار و بەرچاوی لەفراوانتر كردنی جوغزە نورانی یەكەی ئەو ڕابوونە لە ڕانیەدا دیتوە و,هەر هەمان ساڵیش خێزانی پێكەوە ناوە و كوڕو كچێكی بە یادگار بەجێ‌ هێشتوە بە ناوی (شەیدا) و(بەنان).
هەر زوو پەری شیعر خستویەتە ژێر سایەی شاباڵی خۆی و , كۆتایی ساڵی 1987 یەكەم شیعری بە ناوی (نیگاری خودان) نوسیوە و دواتریش شنەی ڕاپەڕین ژیلەمۆی بەهرە و شیعری كۆساری گەشاندەوە و چاوو دڵی تامەزرۆیانی پێ‌ ڕوون كردەوە و , بۆ یەكەم جار نركەی شیعری لە ڕاپەڕینە پڕشكۆیەكەی پێنجی ئازاری ڕانیەدا, بەسەر شەپۆلی نەعرەتەی دەنگە بەسام و هەیبەتەكەی خۆی دا لە بڵیند گۆی مزگەوتی گەورەوە بەرز بۆوە و دەروازەی ڕاپەڕینی هەژاندەوە و,گڕوتینی وەبەر جەماوەری ڕاپەڕیو دەخست ...هەر لەدەروازەی واڵای ڕاپەڕینەوە  تیشكی زیاتر كەوتە سەر شیعرەكانی و,ساڵی 1991 هەندێكیانی بەدەنگی خۆی لە كاسیێتێكدا بەناوی (سەدای كۆساری) تۆمار كردن و , لە ساڵی 1993 ێش بەشی دووەمی (سەدای كۆساری)ی هەر بە دەنگە پڕ لە خرۆشەكەی خۆی بڵاو كردەوە.

     ساڵی 1992ماوەیەك سەرگەرمی نووسین و پێشكەش كردنی بەرنامەی كۆمەڵایەتی  توانج ئامێزی (لێرە و لەوێ‌) بوو لە تەلەفزیۆنی بزوتنەوەی ئیسلامی لە رانیە،كەدواتر ئەو ئەركەی بە شەهیدی مەزن كاك (تەها بابەكر) سپارد كە تا شەهید بوونی لە كاتی ڕووداوەكانی مانگی دوازدەی 1993 دا زۆر بەگەرم و گوڕی ڕایدەپەڕاند.
      لە زۆربەی كۆڕ و ئاهەنگەكانی ناوچەدا جگە لە كۆڕە شیعرییە تایبەتیەكانی خۆی بە دەنگە زوڵاڵا و شیعرە بە هێز و پێزەكانی گوێگرانی هەژاندوون و خستوونیەتە ژیّر بەهرە گەورەكەی .
      یەكێك لە دیاردە دیار و دەگمەنەكانی شاعێرێتی كۆساری ئەوە بوو كە سەرپاكی شیعرەكانی خۆی لە بەربوون و هەمیشە بێ‌ نوسینەوە و لە بەر ڕا، شیعرەكانی دەخوێندنەوە .
    كاتێك لە كۆتایی كانوونی یەكەمی 1993 دا،قەفی زنجیری تاریكی لەگەردنی كێلی كێوەڕەش هاڵا و، دەروازەكەی ڕاپەرین ئەوەندە نووتەك بوو ، تروسكەی لێ بڕا و شەقامەكان هێندە وێك هاتنەوە كە بواری هەنگاو گیرا ، كۆساری وەك تیرە ئەستێرە سنگی نەفامەتی شەوە زەنگی سمی و، لە ئامێزی دەروازەوە خۆی هەڵدایە سەر شانی دەڤەری مەندەمەرانی ئیسلام پەروەر و لەوێ‌ لە ئامێزی ئەودا گیرسایەوە ، بەڵام سەد حەیف و هەزار مەخابن دەرفەتی  لێ‌ هێنراو لەوێ‌ لە27/12 شەهید كرا، دوای شەهید بوونیشی هەر بۆ ئامێزە پڕلە سۆزەكەی كێوەڕەش گەڕایەوە و ،لە گۆڕستانی ڕانیە بەو خاكەیان سپارد كە هەتا ژیا شیعری بۆ گوت و چقڵی چاوی ناحەزانی  بوو .
     سڵاوی خودای ستەم ڕوخێن و تۆڵە ستێن لە گیانە پاكە بەرزە فڕەكەی شەهیدی شیعرو وشەی ڕەسەن و داهێنان و هەموو شەهیدانی  ڕێگای خودا و چەوساوان .... وردو خاش بێت  دەستی ڕەشی ئەبوو لەهەب و هەموو دەستێكی دیكەی هەق  كوژی  و  تاوان .


تایبه‌ت به‌ ماڵپه‌ری ئاهی خه‌م


www.ahyxam.com

ليست هناك تعليقات:

إرسال تعليق

صور المظاهر بواسطة borchee. يتم التشغيل بواسطة Blogger.